Қазақстанда барлық ет түрлерінің өндірісі 5,5%-ға артты.
ҚР Ауыл шаруашылығы министрлігінің баспасөз қызметінің хабарлауынша, Ауыл шаруашылығы министрі Айдарбек Сапаровтың төрағалығымен өткен кеңесте 2026 жылдың бірінші жартыжылдығындағы мал шаруашылығы саласының даму қорытындылары қаралды.
28 Июль 16:21
Редакция Agrokz.com
23
2 мин чтения
Ауыл шаруашылығы министрі атап өткендей, мал шаруашылығы елдің агроөнеркәсіп кешенін дамытудың стратегиялық бағыттарының бірі болып қала береді.
«Әзірленген Кешенді жоспар мал шаруашылығы саласының дамуына жаңа серпін беруі тиіс. Ал мемлекеттік қолдау ауыл шаруашылығы тауар өндірушілеріне уақтылы жетіп, өндіріс көлемін арттыруға және саланың тиімділігін көтеруге ықпал етуі қажет. Осыған байланысты жедел шешуді талап ететін мәселелерді талқылауымыз керек», — деді Айдарбек Сапаров.
Мал шаруашылығы департаментінің директоры Бағлан Аймұрзаевтың мәліметінше, 2026 жылдың алғашқы алты айының қорытындысы бойынша мал шаруашылығының жалпы өнім көлемі 2,058 трлн теңгеден асты. Нақты көлем индексі 104,4%-ды құрады.
Оның айтуынша, саланың барлық негізгі бағыттары бойынша оң динамика байқалады. Барлық ет түрлерінің өндірісі 5,5%-ға, сүт өндірісі 2,4%-ға, жұмыртқа өндірісі 7,9%-ға артты. Сонымен қатар ауыл шаруашылығы жануарларының саны да өскен.
Бұдан бөлек, Кешенді жоспар аясында «Игілік», «Береке» және «Жайлау» жеңілдетілген несие бағдарламалары іске қосылды. Бағдарламалар асыл тұқымды мал сатып алуды, жайылымдық мал шаруашылығын дамытуды жылдық 6% мөлшерлемемен қаржыландыруды және айналым қаражатын жылдық 5%-бен толықтыруды көздейді. Мамандандырылған бордақылау алаңдарын дамыту жұмыстары да жалғасуда.
«Қабылданып жатқан шаралар қазірдің өзінде нақты нәтиже беріп отыр. Ауыл шаруашылығы құрылымдарында барлық ет түрлерінің өндірісі 7,9%-ға артты», — деп атап өтті Бағлан Аймұрзаев.
Сонымен қатар саланы жемшөппен қамтамасыз етуге ерекше көңіл бөлінуде. Өңірлердің жедел мәліметтері бойынша 16 млн тоннадан астам жемшөп дайындалған, оның ішінде 13,8 млн тоннасы — шөп.
Бұл көрсеткіштер саладағы оң динамиканы көрсетеді. Алайда өсімді сақтап қалу үшін Кешенді жоспарды одан әрі іске асырып, қолда бар ресурстарды тиімді пайдалану маңызды.
Кеңесті қорытындылаған Айдарбек Сапаров мал шаруашылығы саласының тұрақты өсімін қамтамасыз ете отырып, қазіргі даму қарқынын сақтау қажеттігін атап өтті.
Войти
